शिवसेनेस पुन्हा एक जोरदार झटका; 'हा' मंत्री नॉट रिचेबल

मुंबई : राज्यातील आणखी एक मंत्री एकनाथ शिंदे यांच्या बंडात आता समाविष्ट होण्याची शक्यता वर्तवली जात आहे. राज्याचे उच्चशिक्षण मंत्री उदय सामंत हे सकाळपासून नॉट रिचेबल आहेत. कालच्या राष्ट्रीय कार्यकारिणीच्या बैठकीला ते उपस्थित होते, मात्र त्यानंतर आज सकाळपासून त्यांचा संपर्क झालेला नाही. शिंदे गटाच्या बंडखोरीने शिवसेना हादरली असून बंड केलेल्या आमदारांवर कारवाई करण्यासाठी शिवसेनेकडून पावले उचलली जात आहे. मात्र दुसरीकडे शिवसेनेला जोरदार धक्का बसला आहे.

 

 

 

 

शिवसेनेतून शिंदे गटात आमदारांच संख्याबळ हे वेगाने वाढत आहे. एकनाथ शिंदे गटात शिवसेनेचे जवळपास 40 आमदार आणि इतर अपक्षांसह जवळपास 50 आमदारांचा समावेश आता पर्यंत आहे. सर्व आमदार सध्या गुवाहाटीमध्ये थांबले आहेत. या बंड केलेल्या आमदारांवर कारवाई करण्यासाठी शिवसेनेकडून पावले उचलण्याची कायदेशीर लढाई आता सुरु झालेली आहे.

 

उदय सामंत यांच्या बंडानंतर शिंदे गटात सहभागी होणारे ते आठवे मंत्री आहेत. आतापर्यंत महाविकास आघाडी सरकारमधील एकनाथ शिंदे, दादा भुसे, अब्दुल सत्तार, संदीपान भुमरे, गुलाबराव पाटील, बच्चू कडू, शंभूराज देसाई यांच्यानंतर उदय सामंत हे आठवे मंत्री आहेत. सामंत यांच्या जाण्याने आता शिवसेनेत विधानसभेतून निवडून आलेले केवळ एकमेव आदित्य ठाकरे हे मंत्री शिल्लक राहिल्याचं बोललं जात आहे. त्यामुळे शिवसेनेला जबर धक्का बसला आहे.