भुवनेश्वर : ओदिशातील ऐतिहासिक जगन्नाथ पुरीच्या रथयात्रेला सोमवारी सर्वोच्च न्यायालयाने सशर्त परवानगी दिली आहे. त्यानंतर आज जगन्नाथ पुरी रथयात्रेला भाविकांशिवाय सुरूवात करण्यात आली आहे. दरम्यान, या रथयात्रेपूर्वी राष्ट्रपती रामनाथ कोविंद, पंतप्रधान नरेंद्र मोदी आणि गृहमंत्री अमित शाह यांनी शुभेच्छा दिल्या.
सर्वोच्च न्यायालयाच्या निर्णयानंतर या रथयात्रेत सहभागी होणाऱ्या प्रत्येकाची कोरोना चाचणी करण्यात आली. त्यानंतर जगन्नाथ मंदिरातील एकाची कोरोना चाचणी पॉझिटिव्ह आली होती. त्यांना या रथयात्रेत सहभागी होण्याची परवानगी नाकारण्यात आल्याची माहिती ओदिशाचे कायदामंत्री प्रताप जेना यांनी दिली. दरम्यान, या रथयात्रेपूर्वी मंदिरात सॅनिटायझेशनचे काम करण्यात आले.