पूर्व लडाखमध्ये दिसले चिनी लढाऊ विमान , चिथावणीखोर कृत्य..
Total Views |
नवी दिल्ली : चिनी लढाऊ विमाने पूर्व लडाखमध्ये तैनात असलेल्या भारतीय सैन्याला चिथावणी देण्याचा प्रयत्न करत आहेत. चीन आपल्या चिथावणीखोर (Chinese aircraft) कृत्यांपासून परावृत्त होत नाही. एका वृत्तानुसार, कॉर्प्स कमांडर स्तरावरील चर्चा सुरू असतानाही, चिनी लढाऊ विमाने अनेकदा प्रत्यक्ष नियंत्रण रेषेजवळ (LAC) उड्डाण करत असतात. गेल्या तीन ते चार आठवड्यांपासून चिनी विमाने नियमितपणे एलएसीच्या जवळून उड्डाण करत आहेत. चीनच्या या कृतीकडे या भागातील भारतीय संरक्षण व्यवस्थेची विस्तृत व्यवस्था तपासण्याचा प्रयत्न म्हणून पाहिले जात आहे.
एएनआयने सूत्रांच्या हवाल्याने म्हटले आहे की, भारतीय हवाई दलही तयार आहे आणि परिस्थितीला अतिशय जबाबदारीने प्रतिसाद देत आहे. भारतीय हवाई दल या धोक्याचा सामना करण्याची एकही संधी सोडत नाही. त्याच वेळी, ते या आक्रमकतेला कोणत्याही प्रकारे संघर्षात वाढू देत नाही. (Chinese aircraft) सरकारी सूत्रांनी सांगितले की, चीनच्या J-11 सह इतर लढाऊ विमाने प्रत्यक्ष नियंत्रण रेषेजवळून उड्डाण करत आहेत. अलीकडच्या काळात, 10 किमी त्रिज्या असलेल्या परिसरात कॉन्फिडन्स बिल्डिंग मेजर (CBM) लाईनचे उल्लंघन केल्याची प्रकरणे समोर आली आहेत. या प्रक्षोभक कारवायांना प्रत्युत्तर देण्यासाठी भारतीय हवाई दलाने जोरदार पावले उचलल्याचे सूत्रांनी सांगितले. भारतीय वायुसेनेने मिग-29 आणि मिराज 2000 सह सर्वात शक्तिशाली लढाऊ विमाने प्रगत तळांवर पाठवली आहेत. या तळांवरून भारतीय हवाई दलाची विमाने काही मिनिटांत चिनी कारवायांना चोख प्रत्युत्तर देऊ शकतात. पीपल्स लिबरेशन आर्मी लडाख सेक्टरमध्ये भारतीय हवाई दलाच्या पायाभूत सुविधांच्या विकासाच्या कामांवरून तणावात असल्याचे दिसते. आता भारतीय हवाई दल त्यांच्या नियंत्रणाखालील भागात चिनी हालचालींवर बारीक नजर ठेवू शकते.