येत्या १८ महिन्यात १० लाख तरुणांना सरकारी नोकरी, केंद्र सरकारची घोषणा

नवी दिल्ली : सरकारी नोकरीबाबत केंद्रातील मोदी सरकारने देशातील तरुणांना मोठी भेट दिली आहे. पंतप्रधान नरेंद्र मोदी यांनी केंद्रीय मंत्रालये आणि विभागांना येत्या १८ महिन्यांत १० लाख भरती करण्याचे निर्देश दिले आहेत. विरोधी पक्ष सातत्याने देशातील बेरोजगारीचा मुद्दा उचलून धरत आहेत, यातच ही घोषणा झाल्यामुळे तरुणांना मोठा दिलासा मिळणार आहे.

 

पंतप्रधान कार्यालयाने ट्विट करुन याबाबत माहिती दिली. 'पंतप्रधानांनी सर्व विभाग आणि मंत्रालयांमधील मानव संसाधनाच्या स्थितीचा आढावा घेतला असून, सरकारने पुढील दिड वर्षांत १० लाख कर्मचाऱ्यांची भरती करण्याचे निर्देश दिले आहेत,' अशी माहिती ट्विटमधून देण्यात आली आहे. केंद्रीय मंत्री जितेंद्र सिंह यांनी या वर्षाच्या सुरुवातीला संसदेत सांगितले होते की, १ मार्च २०२० पर्यंत केंद्र सरकारच्या विविध विभागांमध्ये ८.७२ लाख पदे रिक्त आहेत. आता ही देखील पदे भरण्यात येतील, अशी आशा आहे.

 

PM @narendramodi reviewed the status of Human Resources in all departments and ministries and instructed that recruitment of 10 lakh people be done by the Government in mission mode in next 1.5 years.

— PMO India (@PMOIndia) June 14, 2022

 

मिळालेल्या माहितीनुसार, रेल्वेमध्ये सुमारे १५ लाख मंजूर पदांपैकी सुमारे २.३ लाख पदे रिक्त आहेत. संरक्षण (नागरी) विभागात सुमारे ६.३३ लाख कर्मचाऱ्यांच्या मंजूर संख्येच्या तुलनेत सुमारे २.५ लाख पदे रिक्त आहेत. पोस्ट विभागामध्ये एकूण मंजूर २.६७ लाख कर्मचाऱ्यांच्या तुलनेत सुमारे ९०,००० जागा रिक्त आहेत, तर महसूल विभागात, १.७८ लाख कर्मचाऱ्यांच्या तुलनेत सुमारे ७४,००० रिक्त पदे आहेत आणि गृह मंत्रालयात मंजूर १०.८ लाख पदांपैकी सुमारे १.३ लाख पदे रिक्त आहेत.